كل واحد فينا بيبقى حاطت لنفسه لستّة حاجات نفسه يعملها في حياته لما يكبر، سواء مواهب عايز ينميها أو شغلانة نفسه يمتهنها. وبيحس أن الحياة قدامه كتاب مفتوح وهو عارف إمتى هيقلب كل صفحة فيها.. وتعدي الأيام ونكبر ونلاقي المجتمع مستني مننا أدوار معينة لازم نأديها في الحياة..
البنت مثلًا.. لازم بعد ما تخلص جامعة تتجوز.. لو كبرت ومتجوزتش يبقى فيه حاجة غلط.. ولو أتجوزت لازم تخلف كأنها لو مخلفتش نظام الكون هيختل.. أما الولد بقى لازم يدخل جامعة كويسة عشان يعرف يشتغل شغلانة كويسة يجيب منها فلوس يقدر يصرف بيها على البيت والعيلة اللي لازم يكوّنها عشان ميتقلش عليها إن أخلاقه تلفانة.
وبعد ما نحقق للمجتمع متطلباته.. بيلاقوا نفسهم ضحّوا بحياتهم عشان يحافظوا على ثبات نظام المجتمع اللي هما أصلاً بيكوّنوه بنفسهم.. وبيكتشفوا أنهم محققوش الأحلام اللي كانوا محضرنها لحياتهم، وبيتصدموا في حقيقة أن الحياة لا ترجع للخلف ومش بتدينا فرصة تانية!
حلو أنك تعمل حاجات أساسية في حياتك.. بس لو إنت حاببها.. مش عشان مطلوبة منك، أو إنك لازم تعيش كده عشان الناس هيقولوا إيه ويشوفوك إزاي لو معملتش كده! وده مش معناه إنك تكره الحياة اللي إنت عايشها.. لكن إنك تعمل اللي إنت بتحبه واللي نفسك تبقاه عشان الحياة مش بتتعاد.. للأسف!
No comments:
Post a Comment