أوضة الأسرار

   جوا كل واحد فينا أوضه للأسرار.. عمر ما حد ينفع يدخلها مهما كان قريب قوي منه.. دايمًا بيروحلها هو لوحده.. ودا المكان الوحيد اللي بتكون فيه مراية حقيقة.. بيشوف فيها نفسه.. بكل ما فيها بحلوها ووحشها.. بيشوف فيها دموعه اللي بجد.. طيبته.. حنيته.. قسوته.. ظلمه.. كل عيوبه ونقط ضعفه.. الأوضه دي كمان بيكون فيها كل ذكرياته بحلوها ومرها.. بيواجه نفسه بكل ما فيها... بس الحاجة الوحيدة اللي مش بنقدر نعملها إننا نصلح العيوب اللي فينا أو نعالج نقط ضعفنا..لا بالعكس دا إحنا ساعات كمان بنتمنى نكون شخصيات تاني غيرنا رغم إن برضه الشخصيات اللي بنتمناها دي فيها نقط ضعف.. دايمًا بنكون مستنين حد يعالج عيوبنا ويغيرنا مع إن ده عمره ما بيحصل!

   التغيير بيبتدي من جوه لبره..طول ما إنت مستني تغيير من بره بس.. هتفوتك الحياة وهتفضل حبيس أوضة الأسرار!

ماري كرم